Upp úr hjólförunum

Ég tek ofan af fyrir fólki sem hefur þann kjark að biðja afsökunar. Það skiptir þó máli hvernig það er gert en þetta er vissulega spor í rétta átt hjá Jóhönnu.

Ég hef aðeins verið að fylgjast með umræðum á Alþingi í dag.

Ég verð að segja það að ég bara skil ekki hvernig sumir þingmenn Alþingis virðast bara ekki geta komist upp úr gömlum hjólförum og troðið ný. Alltaf virðast þeir falla ofan í gamla farið og spóla sig dýpra og dýpra.

Það er óþolandi fyrir fólk sem situr heima í miklum erfiðleikum sem eru að stórum hluta afrakstur afglapa og raða mistaka yfir langan tíma horfa upp á þingmenn eyða dýrmætum ræðutíma sínum í leikræn tilþrif, söguskýringar og langar ræður sem fjalla um fortíðina og ekki um neitt. Allt sem fólk hefur heyrt áður, allt of oft.

Nú eiga Alþingismenn að bjóða upp á eitthvað nýtt. Nýja strauma, nýjar ferskar umræður um lausnir og samstöðu.

Það er sorglegt að horfa á hvernig sumir Alþingismenn virðast enn fastir í því að eyða öllu sínu púðri í að kasta rýrð á næsta flokk eða næsta þingmann. Hver græðir eiginlega á því? Þetta minnir mann stundum á leikskóla þar sem hver deildin er upp á móti annarri og allt púður fer í rifrildi um sjálfan leikskólann og fyrir utan hann er enginn heimur til.

Svona vinnubrögð og umræður eru ekki boðleg þjóð sem situr í sárum og þarf röklega umræðu, uppbyggingu, framkvæmdir og framtíðarsýn.

Biður þjóðina afsökunar

Athugasemdir

[Sigurbjörg Eiríksdóttir, 6.10.2009 kl. 20:31]

Góð skrif hjá þér frænka..Ég er orðin svo þreytt á þessu. Gafst upp á að horfa í gærkvöldi..en ég sá á blogginu að formaðurinn þinn hafið þótt standa sig best..Honum var hrósað úr öðrum flokkum og einmitt þannig á það að vera.

Kveðja til þín.