Netið og einstaklingsfjölmiðlun

Undanfarið hef ég verið í togstreitu við sjálfa mig um bloggið og facebook. Þetta hefur kosti og galla. Það að skrifa það sem maður hugsar á netið er eitthvað sem mikilvægt er að hugleiða vel. Það felst nefnilega í því talsverð opinberun á þeim hugarheim sem maður lifir í þá stundina og einnig er margt mistúlkað og hægt að snúa út úr hlutunum á ýmsa vegu. Það hefur til dæmis verið vinsælt að "hengja" fólk fyrir að hafa einhvern tíma haldið einhverju fram á bloggi og vera svo farinn að halda öðru fram síðar. Það er eins og það sé ekki tekið með í reikninginn að fólk á rétt á og skiptir oft um skoðun á einu og sama atriðinu þegar það sér það í nýju ljósi eða aðstæður hafa breyst. Einnig hef ég haft efasemdir um það að vera stanslaust að deila bútum úr sínu lífi með vinum og fólki sem maður þekkir minna á facebook.

Jákvæða hliðin við þetta er sú að það getur verið ánægjulegt, lærdómsríkt og þroskandi fyrir mann sjálfan að skrifa blogg. Það getur líka mögulega gagnast öðrum og þeir haft ánægju af að lesa þær hugrenningar sem settar eru niður. Ég vona að fólk sé ekki að eyða tíma sínum í að lesa svona blogg eins og þetta nema það hafi af því eitthvað gagn eða gaman. Jákvæða hliðin við facebook er að þar opnast möguleiki á því að skyggnast inn um litla rifu inn í líf margra þeirra sem skipta mann einhverju máli og hafa fetað með manni lífsveginn einhvers staðar á leiðinni eða gera enn. Og maður getur á mjög einfaldan máta haft ýmis samskipti sem ekki hefði verið kostur á annars.

En varðandi þessa netmiðla þá er mikilvægt að muna að einungis brotabrot af persónu manneskjunnar skín þar í gegn. Maður velur nefnilega það sem maður setur þar inn og fólk á mjög auðvelt með að sigla undir fölsku flaggi hvar sem er á vefnum. Sumir setja stöðuuppfærslur inn með ákveðnu markmiði, með því að sýna sig í ákveðnu ljósi eða senda ákveðin skilaboð. Það er ólíklegt að síður eins og blogg endurspegli algjörlega þann einstakling sem þær á. Fæstir setja til dæmis inn færslur eða stöðuuppfærslur um það hversu erfitt og ömurlegt lífið getur verið á stundum. Það er mun vinsælla að setja inn færslur sem sýna okkur í hinu jákvæða ljósi. "Var að koma úr ræktinni", "var að taka heitt bananabrauð úr ofninum", "Búin með fjallgöngur dagsins"... Þó einnig sé til að fólk noti þessa miðla til þess að tjá erfiða kafla í sínu lífi og getur það gert heilmikið gagn ef það á við.

Að lokum þarf að hafa það í huga að sá sem les getur túlkað það sem hinn skrifar á ótal ólíka vegu. Af þessu má leiða þá niðurstöðu að draga megi stórlega í efa að blogg, fésbókin og aðrar síður endurspegli raunveruleika þess sem þær á, ekki nema að takmörkuðu leyti. Þrátt fyrir þetta allt geta þessir miðlar verið gagnlegir og skemmtileg sýn á þjóðarpúlsinn sé vel farið með.