Ömurlegt

Mikið er leitt að heyra þetta. Dapurlegt og ömurlegt.

Þetta staðfestir fyrir mér það sem ég taldi mig vita að þær lausnir sem Marinó G. Njálsson, Hagsmunasamtök heimilanna og m.a. Framsókn hafa talað fyrir í nærri tvö ár um leiðréttingu á skuldum eru eina rétta leiðin til að takast á við skuldavandann. Þetta er eina færa leiðin til að ná fram réttlæti og sanngirni í þessu samfélagi. Það hugnast vissulega ekki öllum.

Það hefur verið sorglegt að fylgjast með því að sama rispaða platan hefur verið í spilun í haust og fór í gang á vormánuðum 2009 til þess að slá þessar hugmyndir út af borðinu. Sömu sérfræðingarnir hafa stigið fram og lýst því yfir hversu dýrt þetta sé fyrir þjóðina og þetta muni hafa áhrif á skatta og jafnvel lífeyri "ömmu gömlu".  Síðast virkaði þetta til að stoppa þetta af og hverju er þjóðin bættari núna? Við erum mun verr stödd og það hefði breytt miklu að ráðast strax í þessar aðgerðir! Þessi klisja náði hámarki með málflutningi Árna Páls Árnasonar efnahags- og viðskiptaráðherra þar sem hann ræddi þessi mál við Sigmund Davíð Gunnlaugsson formann Framsóknar í Kastljósinu 11. nóv. Ég hef sjaldan heyrt stjórnmálamann fara með eins mikla froðu og hæstvirtur efnahags- og viðskiptaráðherra við þetta tilefni.

Það er undarlegt í ljósi þess að sú upphæð sem myndi kosta að leiðrétta lán heimilanna (85-185 milljarðar) er aðeins brotabrot af því sem lífeyrissjóðirnir hafa nú þegar tapað með glæfralegum fjárfestingum (600-800 milljarðar), nær ekki 200 milljörðum sem sett var inn í peningamarkaðssjóðina til að tryggja stöðu fjármagnseigenda strax eftir hrun án þess að hika, brot af því sem Icesave hefði kostað þjóðina hefði forseti landsins og þjóðin ekki stoppað þingið af með frumvarpið um síðustu áramót (aðeins vextirnir af Icesave hefðu verið 42 milljarðar á ári um ókomin ár sem þýðir að við værum nú þegar búin að greiða 84 milljarða). Þær gríðarlegu fjárhæðir hefðu farið beint úr landi út úr íslensku hagkerfi en það fjármagn sem færi í leiðréttingu helst inni í hagkerfinu og glæðir það lífi með súrefni. Varðandi lífeyrissjóðina vísa ég í þennan texta úr greininni "Ráðherra snýr raunveruleikanum á hvolf" og voru viðbrögð HH vegna ummæla Árna Páls í Kastljósinu.

Stjórnarmaður í Hagsmunasamtökum heimilanna hefur reiknað út að skv. tillögum HH þurfi lífeyrissjóðirnir að færa niður eignir sínar um 72 - 77 milljarða, það samsvarar um 4% af eignarsafni lífeyrissjóðanna.  Til að setja það í samhengi þá jukust eignir lífeyrissjóðanna beint vegna hækkunar vísitölunnar frá 2008 til dagsins í dag um ríflega 200 milljarða, það eru ekki iðgjöld eða hagnaður vegna þess að stjórnendur þeirra hafi verið svona útsjónasamir í fjárfestingum, heldur verðbólgu- og vísitölutengdir loftbólupeningar sem enginn hefur borgað, ennþá.
http://marinogn.blog.is/blog/marinogn/entry/1104402/

Á móti kemur hjá lífeyrissjóðunum:
1) Lífeyrissjóðirnir keyptu lánasöfn heimilanna sem veðsett höfðu verið í nokkrum erlendum seðlabönkum með afslætti, en eru að rukka þau upp í topp.  Þarna eru þeir búnir að búa sér til hagnað upp á rúmlega 33 milljarða króna.  Það er, að mati HH, ótrúlegt siðleysi hjá sjóðunum að ætla að halda þessum hagnaði hjá sér og hunsa stöðu skuldara.
http://www.althingi.is/altext/139/s/0155.html

Marinó og Hagsmunasamtök heimilanna hafa barist hetjulega fyrir heimilin í landinu og reynt eftir fremsta megni að ná fram sátt, sanngirni og réttlæti í samfélaginu. Þær leiðir hugnast ekki fjárvaldi landsins, m.a. bönkunum og fjármálastofnunum sem fengu við hrunið magnað tækifæri til þess að hirða eignir landsmanna og mjólka heimilin um ókomna tíð. Þrátt fyrir að hafa fengið húsnæðislánin á tombóluverði (greiddu einungis 45% af þeim þegar þau voru flutt yfir í nýju bankana - tap erlendra kröfuhafa) en ætla að rukka þau upp í topp og smyrja hressilega ofan á með öllum mögulegum leiðum. Samkvæmt Marinó græddu bankarnir 420 milljarða við yfirfærslu lánanna á milli bankanna.

„Ég veit ekki betur en að bankarnir hafi fengið 420 milljarða afslátt af lánum heimilanna þegar þau voru færð til nýju bankanna frá þeim gömlu. Af hverju eiga þeir að sitja á þeim pening? Er það réttlæti eða lögmál að þegar bankakerfi setur hagkerfi á hliðina, þá eigi skattgreiðendur að borga fyrir uppbyggingu bankakerfisins og bankakerfið eigi síðan að eignast allar eignir heimilanna?" 

Enda hafa bankarnir verið að skila gríðarlegum hagnaði á sama tíma og heimilum landsins blæðir út.

Það er ömurlegt að þegar allar þekktar leiðir hafa verið notaðar til þess að slá þessa sanngirni útaf borðinu á kostnað heimilanna í landinu án þess að takast að slá ryki í augun á fólki þá skuli menn grípa til þessa viðurstyggilega úrræðis að vega að fólki eins og Marinó persónulega. Það er engin tilviljun. Það er gert vegna þess að menn vita að flestir draga línuna þar. Fæstir vilja að fjölskyldan og fólkið sem maður elskar líði fyrir það að vera ataður auri. Það nægir oft þegar engin önnur vopn duga.

 

Segir sig úr stjórn vegna umfjöllunar Fréttatímans

Athugasemdir

[Sigurður Sigurðsson, 18.11.2010 kl. 23:56]

spot on

[Magnús Helgi Björgvinsson, 19.11.2010 kl. 00:11]

Bara að minna þig á að bankarnir voru ekki með nema um 30 til 40% af íbúðalánum. Bankarnir nýju fengu lánin á 72% af virði þeirra. Og miðað við það eru engir 450 milljarðar sem þeir græddu. Íbúðalánasjóður fékk engin lán með afláttum né lífeyrissjóðir. Bendi þér líka á að nú þegar hefur lífeyrir hjá þeim sem taka lífeyrir verið skertur um t.d. 18% hjá móður minni og ef þeir eiga einhvern pening í banka þá bætir Tryggignarstofnun ekkert á móti. Þannig er móðir mín með um 140 þúsund samtals úr lífeyrissjóði sem hún hefur borgað í í yfir 40 ár og frá Tryggingastofnun. Lífeyrissjóðirnir töpuðu vissulega á vitlausum fjárfestingum en réttlætir það að skerða þá enn meira. Veit ekkert um þessa 200 milljarða sem voru settir í penginamarkaðssjóði en veit að það voru margir að geyma aleiguna sína í þessum sjóðum. T.d. bara í vinnunni hjá mér voru 2 áf 9 sem áttu þar milljónir og fengu peningana sína þaðan ekki fyrr en ári eftir hrun og aðeins um 70% af þeim. Töpuðu þar milljónum.

Nú í dag var Vilhjálmur Bjarnason að benda á að Íbúðalánsjóður hefði í ljósi þess að margir greiddu upp lán hjá þeim með því að taka gengistryggð lán hjá bönkum, verið í vandræðum með að fjárfesta þessum peningum og lánað því aftur til bankana og tapað miklum fjármunum í hruninu og þurfi sennilega bara til að ganga um 40 milljarða nú. Og það án þess að lán séu niðurfærð. Lífeyrissjoðirnir eru aðalfjármögnunaraðili Íbúðalánasjóðs og eiga skuldabréf þar upp á minnir mig 500 milljarða  með veðum væntanlega í íbúðalánum sem eru ríkistryggð. Því er ljóst að flatur niðurskurður bitnar á ríkinu og Lífeyrissjóðum sem ríkið á ekki heldur fólkið sem hefur verið að safna í þá alla sína tíð.

Ég sé það með hryllingi að við lendum í því að í framtíðinni þurfum við að borga hér miklu hærri skatta til að framfleyta öldruðum vegna þess að við notuðum fé þeirra í að greiða niður skuldir okkar. Eða að hér verði aldraðir og öryrkjar við sultarmörk næstu áratugi því að við höfum ekki efni á að sjá þeim fyrir grunnþörfum.  Það eru nefnilega ógurlegar upphæðir sem við þurfum að borga af öllum þeim skuldum sem hvíla á okkur. Hvort sem eitthvað af þeim voru mistök eða ekki.

Finnst að lausnir okkar næstu árin eigi að snúast um að létta greiðslubirgði hjá fólki. Ekki vera að rembast við að hugsa alltaf um eignarhluti fólks. Ef a greiðslubirgði er létt þá hefur fólk meira fé í neyslu. T.d. finnst mér t.d. að lögbinda lægri vexti á húsnæðislán sé skoðandi. Þak á verðtryggingu á þau lán möguleg. Og gæti stuðlað að afnámi verðtrygginar fyrr. Eins skil ég ekki af hverju fólk vill ekki skoða að lengja í húsnæðislánum og lækka greiðslubirgði kannski næstu 5 árin um helming.  Við vitum ekkert hvaða staða verðu orðin þá. En á meðan hefði fólk í sig og á og gæti því lifað betra lífi. Frekar en að lækka lán um 18% sem þýðir að greiðslubirgði lækkar kannski um 15 þúsund á mánuði. Minni á það sem afi sagði við mig einu sinni "maður étur ekki steinsteypu" Og því skil ég ekki þennan hugsunarhátt að öllu máli skipti nú stærð eignarhluta í húsinæðinu. Það reynir ekkert á hann nema að fólk ætli að selja.

[Sigurður Haraldsson, 19.11.2010 kl. 00:19]

Sæl þetta heitir mafía elítunnar sem má ekki hreifa við með nokkru móti og nú er það Marinó sem verður fyrir henni því miður, en það er okkar að stöðva hana og láta ekki komast upp með meira múður!