Avatar

 

Var að koma af myndinni Avatar.

Alveg hugfangin. Mér finnst þetta góð mynd, vel gerð og boðskapurinn í henni vera það sem stendur upp úr. Ætla ekkert að segja of mikið um myndina en þeir sem eiga eftir að sjá hana og vilja ekki vita of mikið ættu að sleppa því að lesa þessa færslu...

Myndin er góð ádeila að mínu mati. Góð ádeila á hvíta manninn sem hefur í gegnum tíðina tekið það sem honum þóknast án þess að hugleiða einu sinni hvort hann eigi rétt á því eða hver fórnarkostnaðurinn sé svo framarlega sem hann fái það sem hann sækist eftir. Fullkomið skilningsleysi gagnvart stöðu og tilverurétti annarra.

Þessi saga minnir á sögu indjánanna og hvernig hvíti maðurinn fór með þá og arðrændi þannig að aldrei munu þeir endurheimta tilveru sína. Þegar þeir vildu ekki gefa eftir það sem ásælst var þá voru indjánarnir álitnir óvinur sem bæri að sigra og þannig var friðsamt fólk leitt út í blóðugt stríð við það að reyna að verja jörð sína og tilverurétt.

Ég leiddi hugann einnig að stöðu okkar Íslendinga. Við erum í þeirri stöðu að sitja á ómetanlegum náttúruauðlindum eins og Avatararnir sem aðrir ásælast og munu ásælast enn fremur í framtíðinni, orkan, fiskurinn, vatnið, nóg landrými og svona má halda áfram. Það er okkar Íslendinga að standa saman og slá skjaldborg um þessar auðlindir okkar sem eiga að vera í sameiginlegri eigu allra Íslendinga um ókomna tíð og ekki að falla í hendur annarra þjóða. Þannig getum við slegið skjaldborg um okkur sem þjóð og tryggt framtíð okkar og afkomu. Þetta er háð því að við getum staðið vörð um þennan sameiginlega sjóð okkar og lifað í sátt og samlyndi um hann eins og Avatararnir gerðu. Borið virðingu fyrir auðlindum okkar og ekki tekið meira af þeim en þörf er á og þannig að ekki verði gengið á þær til frambúðar.

Sagan ber líka þann boðskap að ofvaxna ógn er aðeins hægt að sigra með því að allir taki höndum saman og berjist sem eitt lið gegn henni. Öll dýrin í skóginum sem jafnvel hafa á öðrum tímum ógnað hvoru öðru þurfa sameiginlega að verja þennan tilverurétt. Við Íslendingar VERÐUM að geta staðið saman í því að verja okkar sérstöðu, auðlindir og takast á við þá ógn sem yfir okkur hefur vofað undanfarið þar sem stærri og megnugri þjóðir hafa reynt að kúga okkur.

Og svo að lokum er auðvitað ástarsaga. Öll okkar tilvera snýst ætíð um það markmið að vera elskaður og geta elskað. Menn hafa vaðið eld og brennistein, byggt hallir eða sigrað heilan óvinaher til þess að tryggja sér ástina. Ástin er aflið sem knýr okkur öll áfram á einhvern máta þó það sé í öllum heimsins ólíku myndum og formum.

Athugasemdir

[Siggi (IP-tala skráð) 20.1.2010 kl. 01:57]

Gott að Framsóknarmenn eru farnir að SJÁ. Hér átti að vaða yfir allt og alla, virkja allt og byggja þungaiðnað allstaðar.

Þessi pistill þinn gleður mitt litla hjarta.

p.s. þetta var bara endurgerðin af Pocahontas, núna í 3D.

[Arinbjörn Kúld, 20.1.2010 kl. 02:45]

Algerlega sammála, myndin er góð og boðskapurinn einnig, pistillinn þinn líka.

En það voru framsóknarmenn ásamt sjálfstæðisflokknum sem seldu, gáfu og afhentu sameignir þjóðarinnar einkavinum sínum og skeyttu lítt um hag almennings. Söluverð landsbankans er til dæmis ógreitt ennþá. Engin núverandi flokka á alþingi mun ná að sameina þjóðina, til þess hafa þeir of mikið á samviskunni. Trausti þjóðarinnar munu þeir seint ná á ný, aðeins flokksbundinna félagsmanna. En þetta er bara mín skoðun.

Kveðja að norðan.

[Sólveig Fríða (IP-tala skráð) 20.1.2010 kl. 14:48]

Ég er alveg sammála þér varðandi myndina, hún var alveg geggjuð. Það sem stóð uppúr hjá mér er þessi líking og virkjanaframkvæmdargleðin, það virðist vera að það sem ekki er hægt að meta til fjár sé einskins virði. T.d. eins og sagt er í Draumalandinu, hvað myndum við selja Esjuna á ef þar myndi finnast gull? Ekki er spurning hvort heldur hvað. Við höfum nú átt nokkrum virkjanaumræðum og það er gaman að sjá að þú sérð þetta nokkurn veginn út frá mínum sjónarhornum :)

Sjáumst á fimmtud. :)