Opið bréf til Guðbjarts og Gylfa

Reykjavík 23. febrúar 2011

 

Ágæti, Guðbjartur Hannesson, velferðarráðherra.

Viss hluti samlanda okkar þarf að lifa á lágmarkskjörum frá einum mánaðamótum til þeirra næstu. Til þessa hóps teljast: öryrkjar, ellilífeyrisþegar, atvinnulausir, félagsbótaþegar og starfsmenn á lágmarkslaunatöxtum. Flestallir sem koma að ákvörðun um hversu mikið einstaklingar í þessum hópum hafa úr að spila hafa margfalt hærri tekjur og eru sökum þess illa búnir til að meta aðstæður skjólstæðinga sinna rétt.

Heildartekjur upp á 160 þúsund krónur á mánuði er staðreynd fyrir stóran hóp Íslendinga. Bæði rannsóknir þinna eigin starfsmanna, sérfræðinga og hyggjuvit meðalmannsins benda ótvírætt til þess að nánast ómögulegt sé að ná endum saman með fyrrnefndri upphæð.

Eftir umfangsmikla vinnu á vegum velferðarráðuneytisins var nýlega lögð fram ákaflega gagnleg skýrsla um neysluviðmið (Sjá hér). Hún er vel unnin í alla staði og gefur góða vísbendingu um hvað fólk þarf að lágmarki til að framfleyta sér.

Vegna þessarar skýrslu var sett upp reiknivél (Sjá hér) á vef ráðuneytisins. Samkvæmt henni þarf einstaklingur í leiguíbúð 300.966 krónur í ráðstöfunarfé til þess að eiga fyrir nauðþurftum og öðru sem telst til mannréttinda eins og húsnæði og virkri þátttöku í samfélaginu.

Í ljósi alls þessa leitum við til þín með eftirfarandi spurningu:

Hvernig myndir þú, ágæti Guðbjartur, ráðleggja fólki að ná endum saman með áðurnefndum hundrað og sextíuþúsund króna tekjum á mánuði?

Ráðleggingar þínar gætu orðið upphafið að bættri umræðu um núverandi vandamál þeirra einstaklinga sem glíma við þessa spurningu 12 sinnum á ári.

 

Virðingarfyllst og með ósk um svör.

Ásta Hafberg

Björk Sigurgeirsdóttir

Gunnar Skúli Ármannsson

Elías Pétursson

Jón Lárusson

Kristbjörg Þórisdóttir

Ragnar Þór Ingólfsson

Rakel Sigurgeirsdóttir

 

Bréf með sömu fyrirspurn sent á Gylfa Arnbjörnsson, forseta Alþýðusambands Íslands.

Afrit sent á fjölmiðla.

Athugasemdir

[Magnús Helgi Björgvinsson, 26.2.2011 kl. 20:49]

Bara svona að benda ykkur á að reiknivélin sýnir meðaneyslu einstaklings. T.d. eru laun verkamanna skv. hagstofu 2009- 238 þúsund. Og heildarlaun um 320 þúsund. Þjónustu, sölu i-og afgreiðslufólk var með 293 þúsund í regluleg laun 2009.

Enda ef við skoðum það að leiguverð á íbúð fyrir einstakling er kannski frá 60 til 100 þúsund og þar á móti koma húsaleigubætur upp á 20 til 30 þúsund. Sem gerir að raunverulega greiðir fólk 30 til 70 þúsund. Svo kannski 25 þúsund á mánuði kostanaður af bíl. Þá eru 205 þúsnd eftir sem einstaklingur hefur til ráðstöfunar. Bendi á að í þessum útreikningum í skýrslu um neysluviðmið telja þau að einstaklingur þurfi að hafa um 85 þúsund til ráðstöfunar eftir að húsnæðis og bílakosnaður er tekin frá til að eiga fyrir nauðþurftum. Sé ekki að fólk þurfi 125 þúsund í viðbót við það.

[Jakob (IP-tala skráð) 8.3.2011 kl. 02:56]

smá leiðrétting ég er verkamaður og ég fæ skítnar 5000 kr í húsaleigubætur