Ísland framtíðarinnar

Ég er ánægð að sjá þessa yfirlýsingu frá þessum þremur afbragðs þingkonum sem allar eru í miklum metum hjá mér.

Þessi leiðinda atburður hefur vonandi það jákvæða í för með sér að varpa ljósi á þann ömurlega ósið sem viðgengist hefur alls staðar í okkar samfélagi og ekki síst hjá fjórða valdi fjölmiðlanna að þegar allt annað þrýtur þá er vegið að æru fólks og ekki síður fjölskyldu þess. Sú viðurstyggilega aðferð nægir því miður til þess að lama öflugasta baráttufólk því flestir setja hagsmuni og friðhelgi fjölskyldu sinnar ofar sínum mestu baráttumálum. Það mun ég ávallt gera líka.

Það er líka lýsandi fyrir framtíðarhugsun þessara ágætiskvenna að þær skuli sýna í verki svo góða samvinnu þvert á það hvaða stjórnmálaafli þær tilheyra. Það er skref inn í framtíðarlandið Ísland!

Ég tek undir orð þeirra og hvet Marinó eindregið til þess að halda áfram sínu góða starfi fyrir heimilin í landinu. Án hans og Hagsmunasamtaka heimilanna þá hefðum við íslenskur almenningur afar fá vopn í höndunum til þess að berjast við það ægivald sem íslenskur fjármálaheimur er. Þar liggja gríðarlegir hagsmunir sem samræmast ekki endilega hagsmunum heimilanna í landinu.

 

Hvetja Marinó til að hætta við

Myndband sem öll þjóðin þarf að sjá!

Nú treysti ég á þig!

Þar sem ég mun ekki nýta mér mátt fjölmiðla til þess að auglýsa þá treysti ég á þig að aðstoða mig við að koma mér og mínum stefnumálum á framfæri.

Ef þú þekkir mig þá veistu væntanlega hvað ég stend fyrir. Ef þú þekkir mig minna getur þú skoðað áherslur mínar og greinarnar sem ég hef birt síðustu ár. Ef þig langar til þess að heyra beint í mér getur þú skrifað mér tölvupóst á [e-mail] eða hringt í s: 8978181

Ég þigg allar ábendingar og rýni til gagns því ég veit vel að ég hef ekki öll svörin og er í raun aðeins á upphafsreit varðandi þau málefni sem stjórnlagaþing mun fjalla um. En ég er tilbúin til þess að fræðast, hlusta, lesa mér til og mynda mér þannig upplýsta skoðun.

Svona getur þú hjálpað mér:

• Talað við fólk í kringum þig, jafnvel hringja í það
• Fá nafnspjöld hjá mér og dreifa fyrir mig (sem er einmitt eitt af því sem ég legg kostnað í en greiði úr eigin vasa - ég get því ekki sagt að ég eyði ekki krónu í framboðið því ég mun eyða uþb. 50 þúsund krónum í það)
• Deila heimasíðu framboðsins fyrir mig til dæmis á Fésbókinni
• Deila þessari síðu fyrir mig sem ég hef bloggað á í nokkur ár og hægt er að lesa sér allítarlega til um pælingar mínar í gegnum tíðina
• Deila Fésbókarsíðu framboðsins fyrir mig og smella á "líkar við"
• Deila atburðinum "Kjósa Kristbjörgu Þórisdóttur nr. 6582 á stjórnlagaþing" og smella á "mæti"

Ég virði það ef þú hefur annan frambjóðanda sem þú kýst að nota atkvæði þitt í en vona þá að ég sé á listanum þínum (sem efst auðvitað) og þú látir aðra vita af mér

Þú hefur nefnilega bara eitt atkvæði og 24 til vara samkvæmt þessu kosningakerfi.

Umfram allt hvet ég þig til þess að taka þátt í þessu sögulega tækifæri sem við sem þjóð fáum til þess að stíga skref inn í betri framtíð fyrir land og þjóð

Kær kveðja,

Kristbjörg Þórisdóttir eða á ég að segja nr. 6582...

Eigðu góðan dag og mundu að hvert augnablik er það dýrmætasta sem þú átt!

Ömurlegt

Mikið er leitt að heyra þetta. Dapurlegt og ömurlegt.

Þetta staðfestir fyrir mér það sem ég taldi mig vita að þær lausnir sem Marinó G. Njálsson, Hagsmunasamtök heimilanna og m.a. Framsókn hafa talað fyrir í nærri tvö ár um leiðréttingu á skuldum eru eina rétta leiðin til að takast á við skuldavandann. Þetta er eina færa leiðin til að ná fram réttlæti og sanngirni í þessu samfélagi. Það hugnast vissulega ekki öllum.

Það hefur verið sorglegt að fylgjast með því að sama rispaða platan hefur verið í spilun í haust og fór í gang á vormánuðum 2009 til þess að slá þessar hugmyndir út af borðinu. Sömu sérfræðingarnir hafa stigið fram og lýst því yfir hversu dýrt þetta sé fyrir þjóðina og þetta muni hafa áhrif á skatta og jafnvel lífeyri "ömmu gömlu".  Síðast virkaði þetta til að stoppa þetta af og hverju er þjóðin bættari núna? Við erum mun verr stödd og það hefði breytt miklu að ráðast strax í þessar aðgerðir! Þessi klisja náði hámarki með málflutningi Árna Páls Árnasonar efnahags- og viðskiptaráðherra þar sem hann ræddi þessi mál við Sigmund Davíð Gunnlaugsson formann Framsóknar í Kastljósinu 11. nóv. Ég hef sjaldan heyrt stjórnmálamann fara með eins mikla froðu og hæstvirtur efnahags- og viðskiptaráðherra við þetta tilefni.

Það er undarlegt í ljósi þess að sú upphæð sem myndi kosta að leiðrétta lán heimilanna (85-185 milljarðar) er aðeins brotabrot af því sem lífeyrissjóðirnir hafa nú þegar tapað með glæfralegum fjárfestingum (600-800 milljarðar), nær ekki 200 milljörðum sem sett var inn í peningamarkaðssjóðina til að tryggja stöðu fjármagnseigenda strax eftir hrun án þess að hika, brot af því sem Icesave hefði kostað þjóðina hefði forseti landsins og þjóðin ekki stoppað þingið af með frumvarpið um síðustu áramót (aðeins vextirnir af Icesave hefðu verið 42 milljarðar á ári um ókomin ár sem þýðir að við værum nú þegar búin að greiða 84 milljarða). Þær gríðarlegu fjárhæðir hefðu farið beint úr landi út úr íslensku hagkerfi en það fjármagn sem færi í leiðréttingu helst inni í hagkerfinu og glæðir það lífi með súrefni. Varðandi lífeyrissjóðina vísa ég í þennan texta úr greininni "Ráðherra snýr raunveruleikanum á hvolf" og voru viðbrögð HH vegna ummæla Árna Páls í Kastljósinu.

Stjórnarmaður í Hagsmunasamtökum heimilanna hefur reiknað út að skv. tillögum HH þurfi lífeyrissjóðirnir að færa niður eignir sínar um 72 - 77 milljarða, það samsvarar um 4% af eignarsafni lífeyrissjóðanna.  Til að setja það í samhengi þá jukust eignir lífeyrissjóðanna beint vegna hækkunar vísitölunnar frá 2008 til dagsins í dag um ríflega 200 milljarða, það eru ekki iðgjöld eða hagnaður vegna þess að stjórnendur þeirra hafi verið svona útsjónasamir í fjárfestingum, heldur verðbólgu- og vísitölutengdir loftbólupeningar sem enginn hefur borgað, ennþá.
http://marinogn.blog.is/blog/marinogn/entry/1104402/

Á móti kemur hjá lífeyrissjóðunum:
1) Lífeyrissjóðirnir keyptu lánasöfn heimilanna sem veðsett höfðu verið í nokkrum erlendum seðlabönkum með afslætti, en eru að rukka þau upp í topp.  Þarna eru þeir búnir að búa sér til hagnað upp á rúmlega 33 milljarða króna.  Það er, að mati HH, ótrúlegt siðleysi hjá sjóðunum að ætla að halda þessum hagnaði hjá sér og hunsa stöðu skuldara.
http://www.althingi.is/altext/139/s/0155.html

Marinó og Hagsmunasamtök heimilanna hafa barist hetjulega fyrir heimilin í landinu og reynt eftir fremsta megni að ná fram sátt, sanngirni og réttlæti í samfélaginu. Þær leiðir hugnast ekki fjárvaldi landsins, m.a. bönkunum og fjármálastofnunum sem fengu við hrunið magnað tækifæri til þess að hirða eignir landsmanna og mjólka heimilin um ókomna tíð. Þrátt fyrir að hafa fengið húsnæðislánin á tombóluverði (greiddu einungis 45% af þeim þegar þau voru flutt yfir í nýju bankana - tap erlendra kröfuhafa) en ætla að rukka þau upp í topp og smyrja hressilega ofan á með öllum mögulegum leiðum. Samkvæmt Marinó græddu bankarnir 420 milljarða við yfirfærslu lánanna á milli bankanna.

„Ég veit ekki betur en að bankarnir hafi fengið 420 milljarða afslátt af lánum heimilanna þegar þau voru færð til nýju bankanna frá þeim gömlu. Af hverju eiga þeir að sitja á þeim pening? Er það réttlæti eða lögmál að þegar bankakerfi setur hagkerfi á hliðina, þá eigi skattgreiðendur að borga fyrir uppbyggingu bankakerfisins og bankakerfið eigi síðan að eignast allar eignir heimilanna?" 

Enda hafa bankarnir verið að skila gríðarlegum hagnaði á sama tíma og heimilum landsins blæðir út.

Það er ömurlegt að þegar allar þekktar leiðir hafa verið notaðar til þess að slá þessa sanngirni útaf borðinu á kostnað heimilanna í landinu án þess að takast að slá ryki í augun á fólki þá skuli menn grípa til þessa viðurstyggilega úrræðis að vega að fólki eins og Marinó persónulega. Það er engin tilviljun. Það er gert vegna þess að menn vita að flestir draga línuna þar. Fæstir vilja að fjölskyldan og fólkið sem maður elskar líði fyrir það að vera ataður auri. Það nægir oft þegar engin önnur vopn duga.

 

Segir sig úr stjórn vegna umfjöllunar Fréttatímans

Hvet þig til að taka þátt :) ég er númer 6582

Við íslenska þjóðin stöndum frammi fyrir sögulegu tækifæri.

Við eigum tækifæri til þess að hugsa þann ramma sem styður við grunnstoðir samfélags okkar upp á nýtt. svona tækifæri kemur sennilega ekki fljótlega aftur.

Það skiptir því miklu máli að á stjórnlagaþing veljist gott og heiðarlegt fólk sem mun leiða þessa vinnu. Í því sambandi sakna ég þess að ekki sé kallað háværar eftir hagsmunaskráningu þeirra sem bjóða sig fram en nú þegar er til sú fyrirmynd sem Alþingismenn fylla út í. Ég notaðist við hana til þess að skrá mín hagsmunatengsl sem sjá má á heimasíðu framboðsins www.kristbjorg.wordpress.com og á Facebook: Kristbjörgu Þórisdóttur á Stjórnlagaþing

Nú þegar hefur farið fram þjóðfundur sem heppnaðist mjög vel og voru þar lagðar línurnar sem stjórnlagaþingmenn hljóta að styðjast við á þinginu.

Ég hvet til til þess að kynna þér vel alla frambjóðendur og ekki hugsa þig tvisvar um að taka þátt í þessum sögulegu kosningum.

Tækifærið er núna :)

Á Íslandi eiga allir að geta  haft það gott!

Það er okkar að tryggja að það verði raunveruleiki!

Rúmur helmingur ætlar að kjósa

Hvað er betra en að dansa?

Já, hvað er betra en að dansa?

Um helgina fór ég á sveitaball á Þingeyri og dansaði þar ásamt fólki af öllum aldri. Dansaði í tærri gleði eins og enginn væri morgundagurinn.

Einn dansfélagi minn var sennilega um 50 árum eldri og tókum við hressileg spor undir laginu hans Páls Óskars "Það geta ekki allir verið gordjöss".

Síðan þá hef ég hugsað talsvert mikið um það hversu ómetanlega mikilvægt það er að hafa heilsuna í lagi og eiga þessi tækifæri til þess að njóta lífsins til fulls, óháð aldri, stöðu eða öðru. Að geta gleymt sér í augnablikinu og framkallað þvílíka gleði og sælu á tímum þegar ríkir mikil óvissa, ógn, og annað böl sem getur alveg rænt mann hamingjunni.

Að dansa og syngja er eitthvað sem maðurinn hefur gert frá örófi alda og við gerum nánast hvar sem við erum eða hvaðan sem við komum í heiminum. Það er okkur sammannlegt og dásamlegt!

Gleðin er svo mikilvægt eldsneyti í lífinu. Til að vera glöð þurfum við stundum að skoða viðhorf okkar. Við getum alltaf valið okkur viðhorf í hverjum einustu aðstæðum á hverju einasta andartaki í lífinu. Það hvernig annað fólk eða aðstæður hafa áhrif á okkur hefur fyrst og fremst með það að gera hvaða gler eru í viðhorfaglerjunum sem við erum með á hausnum. Lendum við í gríðarlegum erfiðleikum eða virkilega erfiðu fólki getum við valið okkur það viðhorf að vera þakklát fyrir það mikla tækifæri að fá að læra og vaxa. Við eigum yfirleitt um hlaðborð af mismunandi viðhorfum að velja úr. Ég veit að raunveruleikinn er ekki alltaf svona einfaldur þó og stundum er ákaflega erfitt að snapa fram rétta viðhorfinu og brosa bara að öllu saman... en möguleikinn er alltaf fyrir hendi. 

Ég hvet þig kæri lesandi óháð því hvað þú ert að ganga í gegnum í lífinu til þess að brosa framan í spegilinn, þakka fyrir að fá að draga andann í þessari mögnuðu ferð um móður jörð, syngja hástöfum einn eða í góðra vina hópi og dansa eins og enginn sjái til þín hvar sem þig langar og hvenær sem þig langar til.

Tækifærið til að lifa er núna og þú ert við stjórnina!

http://www.kosning.is/stjornlagathing/frambjodendur/nr/6582

Komnar eru upplýsingar á vefinn www.kosning.is um frambjóðendur og hvet ég alla til þess að kynna sér frambjóðendur vel.

Ég er með heimasíðu sem verður byggð upp í kringum framboðið: http://kristbjorg.wordpress.com/  

Einnig er ég með Facebook síðu um framboðið: http://www.facebook.com/note.php?deleted&note_id=487687194918#!/pages/Kristbjorgu-porisdottur-a-Stjornlagabing/111631408901841

Ég hef bloggað í nokkur ár á þessa bloggsíðu um ýmislegt milli himins og jarðar en mest um samfélagspælingar og hugleiðingar um manneskjuna.

Það sem ég sakna í þessari kynningu á frambjóðendum er hagsmunaskráning og hef ég talað mikið fyrir því að slíkt þyrfti að fylgja með þeirri kynningu sem boðið verður upp á. Ég skrifaði m.a. opið bréf til Dómsmálaráðuneytis varðandi þetta mál: http://www.visir.is/article/2010235294902

Fleiri konur en karlar með framboðssíðu á Facebook

Ráðlagður dagskammtur af pillu sem fær þig til að brosa :)

Lífið er svo stutt og lífið er svo óútreiknanlegt.

Vegir lífsins eru órannsakanlegir og oft vitum við ekki okkar næturstað. 

Eitthvað sem virtist ótrúlegt í gær er raunveruleiki dagsins í dag.

Við þurfum að fara vel með lífið okkar.

Eitt af því sem ég tel vera mjög mikilvægt er að gleyma aldrei gleðinni, gleyma aldrei kærleikanum og fólkinu sem umkringir mann.

Þessi plötusnúður virkar á mig eins og hamingjupilla. Þegar mig vantar skyndiskammt til þess að fá mig til að brosa þá smelli ég á þetta myndband sem góðvinur minn hann Agnar Bragi benti mér á og hækka í botn :) Þvílík og sönn gleði!

Annað sem ég hef verið að hugleiða og var að ræða mikið við góða vinkonu í dag. Ef þú vissir fyrirfram að lífsgöngu þinni myndi ljúka um næstu áramót hverju myndi það breyta? Myndir þú halda áfram að gera sömu daglegu hlutina og þú gerir í dag?

Ég myndi eyða meiri tíma með fólkinu sem ég elska. 

Ég myndi eða meiri tíma úti í náttúrunni og velta fyrir mér undrum augnabliksins í hinni síbreytilegu veröld okkar.

Ég myndi njóta allrar þeirrar menningar sem veitir mér hughrif eins og til dæmis góð tónlist.

Ég myndi njóta hvers augnabliks til hins ítrasta.

Það er svo margt af því sem ég eyði of miklum tíma dags daglega í sem ég myndi ekki gera ef ég þyrfti að forgangsraða tímanum sem ég ætti eftir.

Ég myndi ekki eyða tíma í erfitt fólk.

Ég myndi ekki eyða tímanum í að rífast.

Ég myndi ekki eyða tímanum í áhyggjur af hlutum sem ég get ekki breytt.

Ég myndi ekki eyða tímanum í verkefni sem skipta ákaflega litlu máli þegar upp er staðið.

Ég myndi ekki eyða tímanum í hluti sem væru aðeins til þess að þóknast öðrum en gæfu mér ekkert.

Ég myndi ekki voga mér að drepa tímann við eitthvað sem skiptir mig engu máli.

Svona má lengi telja...

Njóttu hvers dags.

Njóttu hvers einasta augnabliks sem þú dregur andann. 

Lífið er svo stutt og lífið er svo óútreiknanlegt og dýrmætt.

Njóttu ferðarinnar en vandaðu hvert skref og mundu að þú skapar þína hamingju!

Íslenska þjóðin þarf að rísa upp og standa sameiginlega vörð um landið og samfélag okkar!

Ég fór í gær á myndina:

Minning um rányrkju/Social genocide/Memorias del saqueo

Myndin fjallar um hrunið í Argentínu og eftirmála þess. Þjóðin missti auðlindir sínar í hendurnar á hrægömmum og mörg helstu fyrirtækin voru einkavædd. Spilltir stjórnmálamenn tóku þátt í því að færa auðvaldi aðgang að fjöreggjum þjóðarinnar á sama tíma og almúginn var látinn lepja dauðann úr skel, án átvinnu, hungraður og að sligast undan gífurlegri skuldabyrði. Aðkoma AGS varð þjóðinni til hörmungar.

Þessi mynd vakti mig verulega til umhugsunar.

Það er óþægilegt að sjá í myndinni argentínskan almenning reyna að sporna við þróuninni með því að berja í potta og pönnur og mótmæla. Sýn sem er okkur því miður ekki ókunn. Mótmæli sem enduðu í dauðsföllum og blóði.

Í Argentínu var millistéttin nánast þurrkuð út sem er því miður það sem gæti gerst hér verði ekki gripið til róttækra aðgerða.

Hvernig stendur á því að í löndum sem eru svona rík af auðlindum og allir eiga að geta haft það gott þarf græðgin ætíð að fara algerlega úr böndunum? Hvers vegna er það brot af þjóðunum sem eiga nánast allar eignirnar og eru hvergi nærri mettar? Hvenær verður slíkur hópur saddur og tilbúinn til þess að deila sameiginlegum auðlindum þjóða með heildinni? Hvers vegna standa ekki allir stjórnmálamenn með þjóð sinni?

Við VERÐUM að standa öll saman til þess að við lendum ekki í svipuðum sporum og Argentína. Við MEGUM EKKI missa okkar helstu fjöregg úr höndunum fyrir skammtímareddingar eins og að selja djásnin okkar á spottprís og láta spillta elítu sem talar tungum alþjóðaauðvaldsins arðræna okkur og börnin okkar.

Við höfum nú þegar fengið óbragðið af þessu þar sem það munaði mjóu að yfir okkur yrði hellt Icesave einkaskuldum sem hefðu kostað okkur 40 milljarða á ári, aðeins í vexti. Það ætluðu ríkisstjórnarflokkarnir að bjóða þjóðinni sinni.

Valdið er hjá okkur. Við þurfum einungis að standa saman að sameiginlegum hagsmunum okkar allra.

Íslensk þjóð rísi upp áður en það verður of seint!

Auðkennisnúmer mitt er 6582 :)

Ágæti lesandi,

ég er ein þeirra sem er í framboði til stjórnlagaþings.

Ég hef mikinn og einlægan áhuga á samfélaginu á Íslandi sem og landinu sjálfu. Ég býð mig fram til þess að fá tækifæri til þess að láta gott af mér leiða og eiga þátt í því að byggja upp nýtt og betra Ísland. Íslenska þjóðin stendur á tímamótum. Það er okkar að ákveða í hvaða átt við viljum fara og við eigum val um okkar nánustu framtíð. Hvernig landi og samfélagi viljum við skila börnunum okkar og barnabörnum? Til þess að ná árangri þurfum við að finna sameiginlega hagsmuni heildarinnar og berjast saman fyrir þeim sem ein þjóð!

HVERS VEGNA BÝÐ ÉG MIG FRAM?
Á Íslandi eiga allir að geta haft það gott. Í þeim erfiðleikum sem við mætum núna skapast sögulegt tækifæri til þess að endurskoða, læra og breyta samfélaginu til bjartrar framtíðar. Vönduð stjórnarskrá leggur grunninn að framúrskarandi samfélagi með öflugar grunnstoðir. Ég mun starfa með opnum huga, jákvæðni, krafti og metnaði sem fulltrúi þjóðarinnar á stjórnlagaþingi. Áhersluatriði mín eru m.a. mannréttindi, lýðræði, sjálfsákvörðunarréttur þjóðarinnar og þjóðareign á auðlindum. Einnig legg ég áherslu á þrískiptingu ríkisvaldsins, eflingu Alþingis og helstu stofnana þess. Ég hef það að leiðarljósi að gæðum lands, þjóðar og samfélags verði skilað vel til komandi kynslóða.

ÆVIÁGRIP
F. í Reykjavík 9. maí 1978. For: Þórir Guðmundsson (f. 17. nóvember 1936) vélgæslumaður og Bjarndís Eygló Indriðadóttir húsmóðir (f. 14. ágúst 1939 d. 26. janúar 1999). Systur: Guðrún Þórisdóttir (1969), Steinunn Þórisdóttir (1973) og Aðalheiður Þórisdóttir (1978).

MENNTUN
Stúdentspróf MR 1998. BA gráða í sálfræði frá Háskóla Íslands 2002. Diplóma gráða í fötlunarfræðum frá Háskóla Íslands 2006. Kandídatsnám í sálfræði síðan 2008, fyrirhuguð námslok í lok árs 2010.

STÖRF
Stuðningsfulltrúi í Gylfaflöt dagþjónustu fyrir fötluð ungmenni í sumarafleysingu 2009. Stuðningsfulltrúi á öldrunarheimili á Lokalcenter Skelager í Árósum í sumarafleysingu 2008. Forstöðumaður sambýlis hjá Svæðisskrifstofu málefna fatlaðra í Reykjavík (SSR) 2004-2007. Deildarstjóri sama sambýlis 2003-2004. Stuðningsfulltrúi á sama sambýli 1999-2002. Starfsmaður á Kleppi 2003 í stuttan tíma. Ýmis sumarstörf samhliða námi m.a. garðyrkja, afgreiðslustörf í bakaríi, fiskvinnsla og blaðaútburður.

FÉLAGSSTÖRF
Varaformaður Landssambands framsóknarkvenna 2009-2011 (hef stigið til hliðar tímabundið vegna framboðs til stjórnlagaþings). Siðanefnd Framsóknarflokksins 2009-2010. Varamaður í nefnd um erlenda fjárfestingu síðan 2009. Áheyrnarfulltrúi í fjölskyldunefnd í Mosfellsbæ fyrir Íbúahreyfinguna síðan haust 2010. Í miðstjórn Framsóknarflokksins síðan 2006 (hef stigið til hliðar tímabundið vegna framboðs til stjórnlagaþings). Aðalmaður í fjölskyldunefnd í Mosfellsbæ fyrir Framsóknarflokkinn 2006-2007. Anima skemmtinefnd sálfræðinema 1999-2000.

Hef skrifað pistla og greinar um samfélagsmál í ýmis blöð.

AÐEINS UM MIG
Ég hef mikinn áhuga á manneskjunni og samfélaginu í sínni víðustu mynd. Á mörg áhugamál meðal annars hestamennsku, ferðalög, útiveru, líkamsrækt, samverustundir með fjölskyldu og vinum, að borða góðan mat og njóta hvers andartaks í lífinu.
Ég ferðaðist um Kína, Tíbet, Nepal, og Tæland í þrjá og hálfan mánuð haustið 2002.
Ég dvaldi í Árósum í Danmörku frá 2007-2009 við framhaldsnám í sálfræði.

FJÁRHAGSLEGIR HAGSMUNIR OG TRÚNAÐARSTÖRF

1. Launuð stjórnarseta í einkareknum eða opinberum félögum. Staða og félag skulu skráð.

• Engin

2. Launað starf eða verkefni. Starfsheiti og nafn vinnuveitanda/verkkaupa skulu skráð.

• Varamaður í nefnd um erlenda fjárfestingu. Hef setið einn fund.

3. Starfsemi sem unnin er samhliða starfi og er tekjumyndandi fyrir hann eða félag sem hann á sjálfur eða er meðeigandi í. Skráð er tegund starfsemi.

• Engin

4. Fjárframlag eða annar fjárhagslegur stuðningur frá innlendum og erlendum lögaðilum og einstaklingum, þ.á.m. stuðningur í formi skrifstofuaðstöðu eða hliðstæðrar þjónustu. Enn fremur er skráður fjárhagslegur stuðningur í formi afsláttar af markaðsverði og annars konar ívilnunar að verðgildi meira en 50 þús. krónur sem ætla má að sé veittur vegna framboðs til stjórnlagaþings. Skráð er hver veitir stuðninginn og hvers eðlis hann er.

• Engin

5. Gjöf frá innlendum og erlendum lögaðilum og einstaklingum þegar áætla verður verðmæti hennar yfir 50 þús. krónum og ætla má að gjöfin sé veitt út af framboði til stjórnlagaþings. Skrá skal nafn þess sem gefur, tilefni gjafar, hvers kyns hún er og hvenær hún er látin í té.

• Engar

6. Ferðir og heimsóknir innan lands og utan sem geta tengst setu framboði til stjórnlagaþings. Skrá skal hver stóð undir útgjöldum ferðar, tímabil hennar ásamt nafni áfangastaða.

• Engar

7. Eftirgjöf eftirstöðva skulda og ívilnandi breytingar á skilmálum samnings við lánardrottinn. Skrá skal lánardrottinn og eðli samningsins.

• Engar

8. Fasteign, sem er að einum þriðja eða meira í eigu frambjóðanda eða félags sem hann á fjórðungshlut í eða meira, annað en húsnæði til eigin nota fyrir frambjóðanda og fjölskyldu hans og lóðarréttindi undir slíkt húsnæði. Skráð er heiti landareignar og staðsetning fasteignar.

• Engar

9. Heiti félags, sparisjóðs eða sjálfseignarstofnunar í atvinnurekstri, sem frambjóðandi á hlut í sem fer yfir einhver eftirtalinna viðmiða:
a. Verðmæti hlutar nemur að markaðsvirði meira en einni milljón króna miðað við 31. desember ár hvert.
b. Hlutur nemur 1% eða meira í félagi, sparisjóði eða sjálfseignarstofnun þar sem eignir í árslok eru 230 millj.kr. eða meira eða rekstrartekjur 460 millj. kr. eða meira.
c. Hlutur nemur 25% eða meira af hlutafé eða stofnfé félags, sparisjóðs eða sjálfseignarstofnunar.

• Engar

10. Samkomulag við fyrrverandi vinnuveitanda sem er fjárhagslegs eðlis, þar á meðal samkomulag um orlof, launalaust leyfi, áframhaldandi launagreiðslur eða fríðindi, lífeyrisréttindi og ámóta meðan setið er á stjórnlagaþingi. Skrá skal gerð samkomulags og nafn vinnuveitanda.

• Ekkert

11. Samkomulag um ráðningu við framtíðarvinnuveitanda, óháð því að ráðningin taki fyrst gildi eftir að frambjóðandi hverfur af stjórnlagaþingi. Skrá skal gerð samkomulags og nafn vinnuveitanda.

• Ekkert

12. Skrá skal upplýsingar um stjórnarsetu og önnur trúnaðarstörf fyrir hagsmunasamtök, opinberar stofnanir, sveitarfélög og stjórnmálaflokka óháð því hvort þessi störf eru launuð. Skrá skal nafn félags, hagsmunasamtaka, stofnunar eða sveitarfélags og eðli trúnaðarstarfs.

• Sit sem áheyrnarfulltrúi í fjölskyldunefnd í Mosfellsbæ fyrir Íbúahreyfinguna í Mosfellsbæ.
• Sit í miðstjórn Framsóknarflokksins (hef stigið til hliðar tímabundið vegna framboðs til stjórnlagaþings).
• Er varaformaður Landssambands framsóknarkvenna (hef stigið til hliðar tímabundið vegna framboðs til stjórnlagaþings).
• Sit í Siðanefnd Framsóknarflokksins.

Hægt er að hafa samband við mig með því að senda tölvupóst á [e-mail] með ábendingar og fyrirspurnir.

Vefsíður:

http://www.kristbjorg.wordpress.com

Facebook síða framboðsins

 

Nafnalisti frambjóðenda birtur