Leikskólinn Þingborg

Ég er algjörlega búin að fá upp í kok af því að fylgjast með fréttum frá íslensku Alþingi og þá sérstaklega þátttöku þingmanna Sjálfstæðisflokksins.

Það virðist ekki skipta neinu máli hvernig ástandið er í þjóðfélaginu. Það hefur engin áhrif á krakkana á leikskólanum Þingborg sem staðsettur er við Austurvöll, sérstaklega krakkana á bláu deildinni. Þeir virðast halda áfram að finna sér eitthvað að rífast yfir sem skiptir þjóðina nákvæmlega engu máli.

Jú, víst ég gerði þetta frumvarp, hann Ömmi er sko að stela sandkastalanum sem ég byggði segir Guðlaugur... Sko sko hún Jóhanna er að ljúga um samtalið við leikskólastjórann í AGS leikskólanum segir Geir og grenjar...

Ég verð sífellt sannfærðari um það að Sjálfstæðisflokkurinn er eins og kemur fram í þessum pistli ekkert annað en geislavirkur úrgangur sem enginn ætti að koma nálægt á næstunni eigum við að koma þjóð okkar upp úr þeim djúpa pytti sem þessi flokkur ber stærsta ábyrgð á að koma okkur í.

Á meðan stór hluti þingheims hagar sér eins og bjánar á leikskólanum Þingborg sem við almenningur greiðum þeim stórfé fyrir að vera á  þá blæðir þjóðinni út og núna eru 15.000 manns atvinnulausir og sú tala snarhækkar í hverri viku!

Hafa þessir leikskólakrakkar ekkert annað að gera en rífast um fjaðrir til að skreyta sig með? Í hvaða heimi er þetta fólk eiginlega??? Þó það sé öskudagur á næstunni...

Þingmenn karpa um fjaðrir

Ábendingar AGS samhljóma ábendingum Framsóknar

Þær athugasemdir sem Alþjóðagjaldeyrissjóðurinn gerir eru í samræmi við þær athugasemdir sem framsóknarmenn hafa nú þegar gert.

Ég er ánægð með þau vinnubrögð framsóknarmanna að hugsa málin vel í gegn og gæta þess að þau fái eðlilega málsmeðferð. Það varð okkur mjög kostnaðarsamt á haustmánuðum þegar þáverandi ríkisstjórn tók lítt ígrundaðar skyndiákvarðanir um mikilvæg mál.

Góðir hlutir gerast hægt og það verður maður að muna. Ég sjálf vil ekki drepa málunum á dreif heldur vil að þau gangi hratt fyrir sig en sum mál eru þess eðlis að vægi þeirra er það mikið að taka verður þann tíma sem nauðsynlegur er til þess að afgreiða þau á vandaðan og farsælan hátt. Þetta þarf fólk að muna sem fer strax að agnúast ef hlutirnir gerast ekki á skyndihraða að það samræmist ekki þeirri kröfu að um vönduð vinnubrögð sé að ræða.

Þarf að hugsa málið upp á nýtt

Mikilvægi stjórnlagaþings

Ég tel það algjört grundvallaratriði að stjórnlagaþing verði haldið og stjórnarskráin endurskoðuð.

Þetta er rétti tíminn til þess að byggja upp að nýju þegar kerfið hefur hrunið til grunna. Það er mun skynsamlegra að skoða allt frá grunni NÚNA með það fyrir augum að byggja upp nýtt og betra kerfi og það sé klárlega hinn íslenski almenningur sem hafi þar valdið. SEINNA er of seint því þá verður allt farið að snúast á ný en aðeins tímaspursmál hvenær kerfið hrynur þá á ný og plástrarnir slitna af.

Ég skil þess vegna ekki sparnaðartón hvað þetta varðar. Þarna tel ég nýja ríkisstjórn vera að falla í þá vondu gryfju sem íslensk stjórnvöld falla allt of oft í að kasta krónunni fyrir aurinn þeas. að forgangsraða hlutunum ekki rétt og ætla að spara eitthvað sem mun í raun kosta okkur miklu meira þegar upp er staðið! Sumt má alveg kosta pening því mikilvægi þess er það mikið en þá er hægt að draga úr öðru sem er síður mikilvægt. Ég held að flestir Íslendingar séu sammála mér í því að ef eitthvað á að vera framarlega í forgangsröðinni NÚNA þá er það leið til þess að byggja lýðveldið okkar upp á nýjan og betri hátt. Betra Ísland mun ekki fæðast af sjálfu sér!

Það hefði til dæmis verið skynsamlegt að eyða pening í það að lagfæra regluverkið okkar þannig að fyrirtæki og einstaklingar sem eru í forsvari fyrir þeim geti ekki sífellt skipt um kennitölu, byrjað á hreinum grunni en hent skuldunum á þjóðina. Einnig hefði verið skynsamlegt að eyða pening í það að hafa eftirlit í lagi hér og koma í veg fyrir þá þjóðaríþrótt sem stunduð hefur verið í mörg ár í skattsvikum!!! Það er meira að segja gefið út íþróttatímarit á hverju ári sem fjallar um þessa íþrótt sem heitir "Frjáls verslun". Hvað eru þessi félög t.d. að gera á Tortulu??? HALLÓ!!!

Þetta myndi í raun vera svona eins og auglýsingin sagði... Eyddu í sparnað - fyrir þjóðina því þá sætum við borgararnir ekki uppi með þennan risavaxa reikning vegna afglapa og það held ég að mörg heimili hefðu alveg verið til í að kasta nokkrum krónum í og sleppa við þessa níðþungu skuld í staðinn!!!

Kraftmikill frambjóðandi

Hér er kominn fram kraftmikill og öflugur frambjóðandi sem kjósendur ættu ekki að láta fram hjá sér fara.

Bryndís hefur staðið sig með eindæmum vel sem formaður Sambands Ungra Framsóknarmanna (SUF) með góðum stuðningi Eggerts Sólbergs Jónssonar varaformanns. Saman hafa þau myndað teymi sem tekið hefur verið eftir.

Nú fara verðandi frambjóðendur að stíga fram í hrönnum í öllum flokkum.

Annar mjög frambærilegur frambjóðandi tilkynnti framboð sitt í dag en það er Einar Skúlason. Það er ljóst að Framsókn mun skarta mjög öflugu og frambærilegu fólki á listum sínum fyrir komandi kosningar.

Framsókn til framtíðar! - Já, við getum!!!

Stefnir á annað sætið hjá framsókn í Suðurkjördæmi

Athyglisverð ný rödd og samkvæmisleikir Sjálfstæðismanna í partýinu Alþingi

Ég var að fylgjast með umræðum á Alþingi um efnahagsmál.

Ég var eiginlega ánægðust með nýja þingkonu Frjálslynda flokksins hana Ragnheiði Ólafsdóttur. Þar kom fram nýr tónn og ný rödd sem vatt sér strax í meginverkefni þingsins að ræða svart á hvítu þá líðan sem skapast hefur í kjölfar atvinnuleysis og hvernig ástandið er hjá fólkinu í landinu. Hún ítrekaði einnig að þetta væri það sem þingið þyrfti að eyða tíma sínum í en ekki pólitískt karp.

Ég held að sumir þingmenn t.d. þingmenn Sjálfstæðisflokksins gleymi því hreinlega að Alþingi er ekki útibú Valhallar, þeir eru ekki í eigin partýi þar sem þeir geta eytt tímanum í að grenja yfir því að tapa stólaleikjum í samkvæmisleikjum þeim sem þeir búa til eins og stólaleiknum um daginn og að væla yfir því að þeirra mikilsverðu embættismenn skuli þurfa að víkja. Núna er ég enn sannfærðari um það að Geir átti fyrir löngu að vera vikið frá, hann hefur ekkert til málanna að leggja annað en að rífast um að "mín ríkisstjórn var sko betri en þín"!!!

Sem er reyndar það sem þjóðin hefur bókstaflega hrópað í marga mánuði að algjör umskipting verði á öllum embættum í stjórnkerfinu. En álit þjóðarinnar sem er í raun sú sem upphaflega bauð Geir og félögum setu á Alþingi skiptir þá greinilega ekki öllu máli... Það er greinilega mikilvægara að ræða um örfá störf þessara "réttu manna" en störf og starfsöryggi allrar þjóðarinnar!

Niðursveiflan meiri

Styðjum bændur og tryggjum eigin velferð

Vísir, 12. feb. 2009 07:13

Bændur óttast hærra áburðarverð

Kristján Oddsson og Dóra Ruf, bændur að Neðra-Hálsi í Kjós. MYND/GVA

Bændur óttast að áburðarverð muni enn hækka í ár, jafnvel um 20 til 30 prósent. Í fyrra hækkaði áburðarverð um hátt í 80 prósent frá árinu áður.

Ef farið er nokkur ár aftur í tímann kostaði tonnið af áburði um það bil 25 þúsund krónur en var komið yfir 60 þúsund krónur í fyrra. Bændur búa sig undir að draga enn frekar úr áburðargjöf í ár, en segjast lítið svigrúm hafa svo ekki fari að draga úr framleiðslu á mjólk og kjöti.

Við þurfum að standa vörð um bændurna í landinu. Það heldur þessum störfum við og öllum afleiðustörfunum sem myndast í kjölfarið. Það tryggir einnig þann grundvöll að við séum sjálfu okkur næg sem er ákaflega mikilvægt á þeim óvissutímum sem ríkja nú.

Ég vil ekki þurfa að horfa til baka síðar þegar við sætum uppi með arfa lélegt kjöt og aðrar innfluttar afurðir og það væri ekki á færi hins almenna Íslendings að kaupa gott íslenskt kjöt á sama tíma og hver rannsóknin á fætur annarri sýndi mikilvægi þess að borða sem hreinasta fæðu. Við skulum ekki lenda í þeirri stöðu að þurfa að horfast í augu við málsháttinn "Enginn veit hvað átt hefur fyrr en misst hefur".

Miðað við mína reynslu af því að búa í öðru landi þá er það munaður að eiga þær ómenguðu og stórkostlegu landbúnaðarvörur sem við eigum. Hér í Danmörku kaupi ég nánast aldrei kjöt, einstöku sinnum kjúkling af þeirri einföldu ástæðu að það er vont og fjöldaframleitt.

Íslenska lambið, nautið, mjólkin, kjúklingurinn og svínið og allt sem við höfum skulum við standa vörð um og tryggja okkar eigin velferð og heilsu.

Mikilmenni verða til á krepputímum

Ég vil byrja á að hrósa þessu framtaki. Eins og framtakið "Brosum með hjartanu" á Akureyri, fyrirhuguð koma Dalai Lama og fleira þá er þetta einmitt það sem íslenska þjóðin þarf til þess að þjappa sér saman á komandi misserum.

Við megum aldrei gleyma því mikilvægasta í lífinu sem er kærleikurinn.

Ég var að horfa á mynd í kvöld um Kennedy og þá rann upp fyrir mér það að hann talaði og minnti á margan hátt á eftirmann sinn Barack Obama. Báðir eru þeir menn fólksins, maður sér það á þeim og maður heyrir það á rödd þeirra og hvernig þeir tala. Báðir tala þeir út frá hjartanu en spila ekki bara tóna sem þeir halda að þeir nái völdum með. Báðir eru þeir menn sem sjá heildarmyndina og vilja bæta heiminn með góðum leiðum. Báðir sjá þeir að við eigum hvert og eitt miklu meira sameiginlegt en það sem sundrar okkur. Þetta er í anda þess sem Dalai Lama hefur einnig boðað. Allir hafa þeir þennan neista og persónusjarma sem sannur leiðtogi hefur.

Þetta eru stórmenni. Allir þrír hafa verið leiðtogar á ákaflega erfiðum tímum. Það er einmitt á slíkum tímum sem raunverulegu stórmennin og þeir sem eru ekki fæddir leiðtogar skiljast að.

Ég bíð spennt eftir því að sjá slíka leiðtoga koma fram í kjölfar áfallanna á Íslandi. Leiðtoga sem eru fyrir fólkið, eru réttsýnir og ala á kærleik og jöfnum rétti allra, leiðtoga sem sjá upp úr sandgryfjunni og að mörkum sjóndeildarhringsins. Leiðtoga sem láta ekki karp pólitískra flokkshagsmuna, samkvæmisleikja Alþingis og annað rugl færa sýn sína frá því sem mestu máli skiptir: Að vera leiðtogi fólksins á þeim erfiðari tímum sem við höfum farið í gegnum sem þjóð. 

Ég tel Jóhönnu Sigurðardóttur komast næst þessu og Sigmundur Davíð er einstaklingur sem spennandi verður að fylgjast með í þessu tilliti.

Senda jákvæða strauma frá Austurvelli

Ísland og Íslendingar... best í heimi í bókstaflega öllu!

Við erum fámenn þjóð en við erum ákaflega merkileg þjóð. Með miklum dugnaði, kjarki, þor og seiglu hefur okkur tekist á mjög skömmum tíma heimssögunnar að komast úr moldarköfum á þann stað að vera á heimsmælikvarða. Í öllu meira að segja bankahrunum...

Við höfum verið hamingjusamasta þjóð heims, verið í fararbroddi í heilbrigðismálum, fætt af okkur ótrúlega eftirminnilega listamenn sem hafa lagt heiminn að fótum sér. Íslendingar hafa að mörgu leyti skarað fram úr hvar sem þeir koma. Sumir kannski tekið þetta með að leggja heiminn að fótum sér aðeins of bókstaflega...

Ég held að sú sérstaða að búa ein og óstudd langt úti í hafi hafi leitt til þessarar seiglu þjóðarinnar. Við höfum lært að skapa okkar eigin örlög og lært að vera úrræðagóð og framsýn með meiru. Kannski vegna fámennisins að þá hefur hjarðhegðun og mannleg flatneskja verið sjaldgæfari. Við höfum haft úr fleiri hlutverkum að spila á mann en í stærri samfélögum og viljum skara fram úr.

Við höfum meðal annars byggt upp velferðarkerfi sem er í fremstu röð. Þess má geta að framsóknarmenn hafa verið þaulsetnir í velferðarráðuneytunum á meðan sjálfstæðismenn hafa setið í efnahagsráðuneytunum... Við erum samt kröfuhörð og ég er mjög kröfuhörð kona og vil sjá þau miklu betri en þau eru í dag þrátt fyrir góðar niðurstöður samanburða við önnur ríki. Lengi má gott gera framúrskarandi!

Oft er sagt að það sem er mesti galli manns sé einmitt líka mesti kosturinn. Tvær hliðar á sama peningi. Núna þurfum við að muna það að halda þeirri hlið uppi sem er dugnaðurinn okkar, framsýnin, framtakssemin, eljan, kjarkurinn, þorið, seiglan, baráttuandinn og hugsunin um að við séum best í heimi!

Þá munum við komast vel út úr þeim hremmingum sem við sitjum í núna.

Við skulum ekki bara standa vörð um okkar góðu kerfi. Við skulum öll hugsa út fyrir rammana að nýjum úrræðagóðum lausnum sem miða að því samhengi sem við lifum í í dag. Þannig veit ég að við getum eignast kerfi sem eru enn betri  þrátt fyrir að þrengi að. Við skulum sýna það í uppbyggingu okkar að við erum best í heimi! Líka í því að byggja upp nýtt fyrirmyndar samfélag.

Ísland heilsusamlegast í heimi

Aðgengi almennings að sálfræðingum

Það er mjög mikilvægt á þeim tímum sem uppi eru að aðgengi almennings að sálfræðingum verði aukið eftir öllum mögulegum leiðum.

Meðferð hjá sálfræðingi hefur hingað til verið lúxusvara sem fáir hafa getað veitt sér. Tíminn hjá sálfræðingi kostar frá c.a. 8.000-10.000 krónur eftir því sem ég best veit. Hún er ekki niðurgreidd af ríkinu eins og þjónusta geðlækna.

Á nýafstöðnu flokksþingi okkar framsóknarmanna ályktuðum við um að auka aðgengi almennings að þjónustu sálfræðinga. Meðferð sálfræðinga þarf að vera niðurgreidd á sama hátt og meðferð geðlækna og annarra heilbrigðisstétta til að hún sé raunverulegur valkostur fyrir aðra en hátekjufólk. Ýmsar leiðir má fara að því markmiði. Ein leið er sú að heimilislæknar gætu skrifað upp á viðtal hjá sálfræðingi og mögulega meðferð á sama hátt og þeir geta ávísað lyfjum og núna hreyfingu.

Rannsóknir hafa sýnt fram á það í mörg ár að í sumum tilfellum er sálfræðileg meðferð farsælli lausn en lyf og getur oft einnig verið mjög góð viðbót við lyfjameðferð. Eftir slíka meðferð hefur fólk ákveðið verkfæri í höndum sem það býr alltaf að til að takast á við erfiðleika og vanlíðan. Það dregur úr líkum á hrösun sem er mjög algeng þegar fólk hættir að taka lyf.

Í mínum huga er þetta engin spurning og ég furða mig á að þetta sé ekki löngu búið því ég er sannfærð um að það fjármagn sem nýtt er í slíkt skilar sér margfalt tilbaka í minni lyfjanotkun auk margþættra óbeinna áhrifa (t.d. færri veikindadaga í starfi, minni líkur á líkamlegum kvillum, betri möguleikar á að takast á við ýmis hlutverk t.d. foreldrahlutverk og því minna álag á félagsþjónustu og fleira og fleira).

Þetta er hreint og klárt velferðarmál sem ég vona að velferðarvaktin líti til.

Jóhanna Sigurðardóttir, núna er þinn tími kominn!

Hvenær kemur tími sálfræðinga?

Velferðarvakt sett á laggirnar

Farsæl efnahagsstjórn Davíðs Oddssonar og Sjálfstæðisflokksins síðastliðin 17 ár

Ég var að horfa á Kastljós kvöldsins. Þar var því haldið fram af Sveini Andra nokkrum að Davíð Oddsson væri heppilegur sem Seðlabankastjóri vegna þess meðal annars að hann byggi yfir langri reynslu sem farsæll yfirmaður efnahagsmála í landinu til margra ára. Heyrði ég þetta rétt?

Er maðurinn að grínast? Þessi 17 ára valdatíð hans og Sjálfstæðisflokksins og ábyrgð á efnahagsmálum hefur komið þjóðinni á heljarþröm.

Á sama tíma lýsir Sigurður Kári þingmaður sama flokks vel afleiðingum þessarar farsælu efnahagsstjórnar: algjöru hruni á öllum sviðum efnahagslífsins. Og hinn annars ágæti þingmaður hefur einnig áhyggjur af því að þessu verði mætt með skattahækkunum! Hvaða leið aðra sér hann fyrir þjóðina til þess að taka ábyrgð á klúðri því sem meðal annarra hans flokkur ber höfuðábyrgð á. Ætlar hann að fara að rækta peningatré? Hefur hann aðrar lausnir?

Ég sé ekki annað en Sjálfstæðisflokkurinn sé í mesta basli nú þegar Teflon húðin þeirra er farin að þynnast og fólk raunverulega sér ábyrgð þeirra án þess að þeim takist að klína því á aðra flokka. Ég fæ ekki séð að þessir menn lifi í sama raunveruleika og þorri þjóðarinnar. Það er eins og þeir búi bara á annarri eyju!

Ég er hins vegar þeirrar skoðunar að vissulega bera aðrir flokkar þar meðtalinn minn flokkur sína ábyrgð á þeirri stöðu sem við erum í. Hver og einn á ekki að hika við að viðurkenna sín mistök í auðmýkt, læra af þeim og gera betur í framtíðinni. Það er fylgifiskur þess að taka ákvarðanir að hluti þeirra verða alltaf rangar ákvarðanir og því mistök. Það slæma er að oft sér maður það aðeins eftir á.

Mikið vona ég að þjóðin fái hvíld að minnsta kosti næstu fjögur árin frá óheftri frjálshyggju og óraunveruleika hins Teflon húðaða Sjálfstæðisflokks. Innan hans er þó auðvitað hæft fólk eins og í öllum flokkum og með persónukjöri gætu þeir einstaklingar átt erindi á þing.

Þýðir ekki að klína sök á Sjálfstæðisflokkinn